काठमाडौं–नेपालको पूँजी बजार इतिहासमा एउटै संस्थाको अहिले सम्मकै ठूलो प्राथमिक शेयर (आईपीओ) निष्कासन हुँदैछ । नेपाल इन्फ्रास्ट्रक्चर बैंकले सर्वसाधारणका लागि जारी गरेको आईपीओमा आजदेखि (माघ २)आवेदन दिन सकिने छ । बैंकको आईपीओमा छिटोमा माघ ६ गतेसम्म आवेदन दिन सकिनेछ । त्यस अवधिभित्र पूर्ण आवेदन नपरे माघ १६ गतेसम्म निष्काशन अवधि थपिनेछ ।

बैंकले आठ करोड कित्ता (८ अर्ब रुपैयाँको) आईपीओ निष्कासन गरेको छ । । यो नेपालको पूँजी बजारको इतिहासमा अहिलेसम्म कै ठूलो आईपीओ हो ।

२० अर्ब रुपैयाँ जारी पुँजी रहेको कम्पनीले सर्वसाधारणलाई जारी पुँजीको ४० प्रतिशत सेयर वितरण गर्न लागेको हो । यसमध्ये ०.२ प्रतिशत अर्थात् एक लाख ६० हजार कित्ता सेयर कर्मचारीका लागि छुट्याइएको छ भने ५ प्रतिशत अर्थात् ४० लाख कित्ता सेयर सामूहिक लगानी कोषका लागि राखिएको छ ।

१५ लाखले आईपीओमा आवेदन गरे र सबैले ५० कित्ता र सो भन्दा बढीले आवेदन गरेको खण्डमा कम्तिमा ५० कित्ता सेयर सबैले पाउनेछन् । तर सबै आवेदकले ५० कित्ता आवेदन नगरेको खण्डमा भने प्रत्येक आवेदकले ६० देखि ८० कित्तासम्म सेयर पाउने सम्भावना रहेको छ । यसमा न्यूनतम ५० कित्ता आवेदन गर्दा उपयुक्त हुने देखिन्छ ।

आईपीओ निष्काशन पश्चात बैंकको चुक्ता पूँजी २० अर्ब रुपैयाँ पुग्नेछ । चालु वर्षको पहिलो त्रैमास अनुसार बैंक १८ करोड रुपैयाँ नाफामा आर्जन गरेको छ । बैंकले २० अर्बको ’निफ्रा डेब्ड फण्ड’ स्थापना गर्ने र विदेशी वित्तीय बजारबाट ग्रीन बण्ड जारी गर्ने तयारी गरिरहेको छ । यो बन्ड ५ अर्बको हुनेछ । बैंकले आफ्नो अगुवाइमा लगानी गर्न जलविद्युत, सिमेन्ट क्लिंकराइजेसन एवं सौर्य ऊर्जासमेत गरी ५ वटा परियोजनाहरुमा ६ अर्ब कर्जा स्वीकृत गरिसकेको छ ।

कम्पनीको कुल सेयरमा १० प्रतिशत हिस्सा नेपाल सरकारको छ । बाँकी अन्य बैंक तथा वित्तीय संस्था र निजी क्षेत्रको इक्विटी लगानी गरेका छन् । बैंकको सञ्चालक समिति अध्यक्षमा अनुज अग्रवाल छन् भने सञ्चालकहरूमा चन्द्रप्रसाद ढकाल, श्रीकृष्ण नेपाल र लालमणि जोशीलगायत रहेका छन् । साधारण सेयर जारी गरेपछि सञ्चालक समितिमा तीन जना सर्वसाधारणबाट सञ्चालक बन्ने छन् ।
बैंकले आर्थिक वर्ष २०७९र८० सम्ममा सञ्चित नाफा १ अर्ब ५९ करोड ९६ लाख ३० हजार रुपैयाँ पुर्याउने प्रक्षेपण गरेको छ । आर्थिक वर्ष २०७४र७५ मा सञ्चित नाफा ९ करोड ४५ लाख ६३ हजार रुपैयाँ, आर्थिक वर्ष २०७५र७६ मा ६२ करोड ३२ लाख १९ हजार रुपैयाँ रहेको थियो ।

आर्थिक वर्ष २०७६र७७ को अपरिष्कृत वित्तीय विवरण अनुसार सञ्चित नाफा १ अर्ब २३ करोड ३४ लाख ७१ हजार रुपैयाँ रहेको कम्पनीले सार्वजनिक गरेको विवरण पत्रमा उल्लेख छ । चालू आर्थिक वर्ष २०७७र७८ मा बैंकले १ अर्ब ७४ करोड ४३ लाख रुपैयाँ, आर्थिक वर्ष २०७८र७९ मा १ अर्ब ३७ करोड ९ लाख रुपैयाँ सञ्चित नाफा कमाउने प्रक्षेपण गरेको छ ।

यस्तै, आर्थिक वर्ष २०७९र८० सम्ममा प्रतिशेयर नेटवर्थ ११२ रुपैयाँ ८० पैसा र प्रतिशेयर आम्दानी ८ रुपैयाँ ८२ पैसा पुग्ने कम्पनीले प्रक्षेपण गरेको छ । गत आर्थिक वर्षको अपरिष्कृत वित्तीय विरण अनुसार बैंकको प्रतिशेयर नेटवर्थ १०६ रुपैयाँ ५७ पैसा र प्रतिशेयर आम्दानी ६ रुपैयाँ १० पैसा रहेको छ ।

चालु आर्थिक वर्षमा बैंक प्रतिशेयर नेटवर्थ ११७ रुपैयाँ ६९ पैसा र प्रतिशेयर आम्दानी ५ रुपैयाँ ५८ पैसा हुने प्रक्षेपण गरिएको छ ।