काठमाडौँ — चालु सातामा समग्र सेयर बजार मापन गर्ने नेप्से परिसूचक १०८.२२ अंकले वृद्धि भई लगानीकर्ताका लागि सकारात्मक संकेत देखिएको छ। बजारमा कारोबार भएका कम्पनीहरूमध्ये २१९ कम्पनीको सेयर मूल्यमा वृद्धि हुँदा २९ कम्पनीको सेयर मूल्य घटेको छ।

साताभरिमा जलविद्युत्, विकास बैंक, फाइनान्स, बीमा, लघुवित्त, होटल तथा पर्यटन र लगानी उपसमूहप्रति लगानीकर्ताको आकर्षण देखिएको हो। जीवन बीमा उपसमूह ८.५०%, फाइनान्स ७.३८%, विकास बैंक ७.२६%, निर्जीवन बीमा ७.०२%, बैंकिङ ५.२५%, लघुवित्त ५.१६% र लगानी उपसमूह २.९८% ले वृद्धि भएको हो।

यो साता पनि जलविद्युत् कम्पनीहरूले सेयर बजारमा वर्चस्व कायम गरेका छन्। सबैभन्दा धेरै कमाउने कम्पनीहरूको सूचीमा चार जलविद्युत् कम्पनीहरू परे भने मूल्य घटाउने कम्पनीहरूको सूचीमा आठ जलविद्युत् कम्पनी थिए। कारोबार रकमका आधारमा शीर्ष १० कम्पनीहरूमध्ये ९ वटा जलविद्युत् क्षेत्रकै थिए।

साताभरिमा सबैभन्दा बढी कमाउने कम्पनीमा राप्ती हाइड्रो, सिन्धु विकास बैंक, ग्रिन डेभलपमेन्ट बैंक, खानीखोला हाइड्रोपावर, नेपाल इन्स्योरेन्स, भूगोल इनर्जी, नेपाल फाइनान्स, विन नेपाल लघुवित्त, विन्ध्यवासिनी हाइड्रो र धौलागिरी लघुवित्त परेका छन्।

त्यस्तै, मूल्य घटाउने प्रमुख कम्पनीहरूमा मध्य सोलु, बुटवल पावर, कालिका पावर, पञ्चकन्या माई, जोशी हाइड्रो, हिमालयन पावर पार्टनर, ग्रिनलाइफ हाइड्रो, मायाखोला हाइड्रो, क्रेस्ट माइक्रो लाइफ र गार्डियन माइक्रो लाइफ परेका छन्।

सप्ताहव्यापी कारोबारमा सबैभन्दा बढी कारोबार साहस ऊर्जा कम्पनीको भएको हो, जसको सेयर कारोबार रकम १ अर्ब ८२ करोड १ लाख रुपैयाँ थियो। कुल कारोबार रकम ३९ अर्ब ९३ करोड २३ लाख रुपैयाँ पुगेको छ।

नेप्से सूचकको वृद्धि संगै कुल बजार पुँजीकरण ४५ खर्ब ५ अर्ब १९ करोड रुपैयाँमा पुगेको छ, जुन अघिल्लो हप्ताको तुलनामा १ खर्ब ८० अर्ब ३० करोडले बढी हो।