काठमाडौं । चालु आर्थिक वर्ष २०८१/८२ को ११ महिनामा नेपालले १५ खर्ब ३२ अर्ब ९३ करोड रुपैयाँ बराबरको रेमिट्यान्स प्राप्त गरेको छ। नेपाल राष्ट्र बैंकका अनुसार, यो रकम अघिल्लो वर्षको सोही अवधिको तुलनामा १५.५ प्रतिशतले बढी हो।

अघिल्लो वर्ष सो अवधिमा विप्रेषण आप्रवाह १७.२ प्रतिशतले वृद्धि भएको थियो। हालसालैको जेठ महिनामा मात्र १ खर्ब ७६ अर्ब ३२ करोड रुपैयाँको रेमिट्यान्स भित्रिएको छ, जुन अघिल्लो वर्षको जेठमा प्राप्त १ खर्ब २८ अर्ब ९१ करोड रुपैयाँको तुलनामा उल्लेखनीय वृद्धि हो।

यस अवधिमा अमेरिकी डलरमा विप्रेषण आप्रवाह पनि १२.७ प्रतिशतले वृद्धि भई ११ अर्ब २५ करोड डलर पुगेको छ। अघिल्लो वर्ष यो दर १५.२ प्रतिशत थियो।

समीक्षा अवधिमा कुल ‘खुद द्वितीय आय’ (net transfer) १६ खर्ब ६८ अर्ब ३० करोड रुपैयाँ पुगेको छ, जुन अघिल्लो वर्षको सोही अवधिको १४ खर्ब ४३ अर्ब १० करोड रुपैयाँभन्दा १५.۶ प्रतिशतले बढी हो।

यसबीच, वैदेशिक रोजगारीका लागि श्रम स्वीकृति लिने नेपालीहरूको संख्या पनि उल्लेख्य रहेको छ। नयाँ श्रम स्वीकृति (संस्थागत तथा व्यक्तिगत) पाउनेको संख्या ४ लाख ५२ हजार ३२४ पुगेको छ भने पुनः श्रम स्वीकृति लिनेको संख्या ३ लाख ८ हजार ६७ रहेको छ। अघिल्लो वर्ष यस्ता संख्याहरू क्रमशः ४ लाख २१ हजार ३५६ र २ लाख ६१ हजार २१० थिए।