काठमाडौँ — प्रत्येक वर्ष कार्तिक शुक्ल षष्ठीका दिन मनाइने छठ पर्वको मुख्य दिन शुक्रबार साँझ अस्ताउँदो सूर्यलाई पूजा गरी अर्घ दिइँदैछ। चार दिनसम्म मनाइने यो पर्व बुधबार कार्तिक शुक्ल चतुर्थीदेखि सुरु भएको थियो, जुन शनिबार उदाउँदो सूर्यलाई अर्घ दिएर सम्पन्न हुनेछ।

धार्मिक मान्यता अनुसार, सूर्य पुराणमा अत्रिमुनिकी पत्नी अनुसूयाले पहिलोपटक छठ व्रत गरेको उल्लेख छ। त्यसबेलादेखि परम्परागत रूपमा मनाउँदै आइएको यो पर्वले अटल सौभाग्य र पारिवारिक सुख प्राप्त हुने विश्वास छ। यो पर्वमा दुःख र दरिद्रताबाट मुक्ति पाइन्छ भन्ने जनविश्वास रहेको छ। व्रत बस्न नसक्नेहरूले अरूसँग व्रत गराउने चलन पनि छ, र आर्थिक कठिनाइ भएका मानिसहरू भिक्षा मागेर भए पनि यस पर्वमा सहभागी हुन्छन्।

छठ पर्वको व्रत विधिअनुसार, चतुर्थीका दिन स्नान गरी एक छाक खाइन्छ। पञ्चमीका दिन खरना विधिअन्तर्गत सखर हालेर बनाइएको खीर षष्ठी मातालाई चढाई थोरै मात्रामा प्रसादस्वरूप ग्रहण गरिन्छ। मुख्य दिन षष्ठीमा कठोर निराहार व्रत बसी साँझमा अस्ताउँदो सूर्यलाई पूजा गरी अर्घ दिइन्छ। सप्तमीको बिहान उदाउँदो सूर्यलाई पूजा गरेर विधिपूर्वक अर्घ दिएपछि यो पर्व सम्पन्न हुन्छ।

यस पर्वमा विधिपूर्वक सूर्यको पूजा गरे चर्म रोग नलाग्ने धार्मिक विश्वास छ। पहिले तराई क्षेत्रमा मात्रै मनाइने यस पर्वले अहिले राष्ट्रिय स्वरूप ग्रहण गरेको छ। राजधानीका गुह्येश्वरी, गहनापोखरी, कमलपोखरी, वागमती, नख्खु, र विष्णुमतीलगायत नदी किनारहरू झलमल्ल पारिएका छन्, जहाँ भक्तजनहरूको उल्लेख्य भीड छ।