काठमाडौँ । आज कुशे औँसी अर्थात् बुबाको मुख हेर्ने दिन। नेपाली समाजमा जन्मदाता बुबाप्रति सम्मान, श्रद्धा र कृतज्ञता प्रकट गर्दै आज कुशे औँसी मनाइँदै छ।

भाद्र कृष्ण औँसीका दिन मनाइने कुशे औँसीलाई बुबाको सम्मान गर्ने विशेष दिनका रूपमा लिइन्छ। यस दिन छोराछोरीले आफ्ना बुबालाई भेटेर मिठा–मिठा परिकार खुवाउने, नयाँ कपडा तथा उपहार दिने र आशीर्वाद लिने परम्परा छ।

बुबा नभएका तथा टाढा रहेका सन्तानले समेत सम्भव भएसम्म घर पुगेर वा फोन तथा अन्य माध्यमबाट बुबालाई सम्झने गरेका छन्। दिवंगत बुबाको सम्झनामा विभिन्न धार्मिक स्थलमा पुगेर श्राद्ध, तर्पण तथा पूजा गर्ने चलनसमेत रहेको छ।

कुशे औँसीका अवसरमा घरमा पूजाआजा गरी पवित्र वनस्पति कुश भित्र्याउने परम्परा पनि छ। हिन्दु धर्मावलम्बीले कुशलाई धार्मिक कार्यमा महत्वपूर्ण मान्ने भएकाले आजको दिन कुश संकलन तथा घरमा राख्ने गरिन्छ।

बुबा जीवित भएका सन्तानका लागि प्रत्यक्ष रूपमा सम्मान र आशीर्वाद लिने अवसर बनेको यो दिन बुबा गुमाइसकेकाहरूका लागि भने उहाँको सम्झना गर्ने विशेष दिनका रूपमा लिइन्छ।

बुबाको त्याग, संघर्ष, माया र योगदानप्रति सम्मान व्यक्त गर्ने यस पर्वले परिवार तथा सन्तानबीचको आत्मीय सम्बन्धलाई थप बलियो बनाउने विश्वास गरिन्छ।