बुधबार शेयर बजारमा गिरावट देखिएको छ। नेपाल स्टक एक्सचेञ्ज (NEPSE) परिसूचक २४.४५ अंकले घटेर २९३५.९४ विन्दुमा झरेको हो। पछिल्ला पाँच दिनदेखि निरन्तर बढिरहेको बजारमा अल्पकालीन लगानीकर्ताले नाफा सुरक्षित गर्न थालेपछि करेक्सन आएको देखिन्छ।

यस दिन सेन्सेटिभ इण्डेक्स ६.५४ अंकले घट्दा फ्लोट इण्डेक्स २.४६ अंक र सेन्सेटिभ फ्लोट इण्डेक्स २.२६ अंकले ओरालो लागेको छ। बजार घटे पनि कारोबार रकम भने बढेको छ। मंगलबार १४ अर्ब ८३ करोड रुपैयाँको कारोबार भएकोमा बुधबार ३४५ कम्पनीका १ लाख ३८ हजारभन्दा बढी कारोबारमार्फत करिब १५ अर्ब ९ करोड रुपैयाँ बराबरको शेयर किनबेच भएको छ।

कारोबारका क्रममा केही कम्पनीको शेयर सकारात्मक सर्किट लेभलमा पुगेका छन्। रिलायन्स स्पिनिङ्ग मिल्स, सुपर खुदी हाइड्रोपावर, सोलु हाइड्रोपावर, भुजुङ्ग हाइड्रोपावर र होटल फरेष्ट इन का शेयर उच्चतम सीमा (सर्किट) मा कारोबार भए। पञ्चकन्या माइ हाइड्रोपावर को शेयर मूल्य करिब १० प्रतिशतले बढ्दा अभियान लघुवित्त वित्तीय संस्था को मूल्य ७.७४ प्रतिशतले घटेर सबैभन्दा धेरै घट्नेमा परेको छ।

कारोबार रकमका आधारमा ङादी ग्रुप पावर शीर्ष स्थानमा रह्यो, जसको ५२ करोड रुपैयाँभन्दा बढीको शेयर किनबेच भयो। त्यस्तै अपि पावर कम्पनी र शिवम् सिमेन्ट्स पनि उच्च कारोबार हुने कम्पनीमा परे।

उपसमूहगत रुपमा हेर्दा १३ मध्ये २ उपसमूह मात्र बढेका छन् भने ११ उपसमूह घटेका छन्। व्यापार उपसमूह ३.४५ प्रतिशतले सबैभन्दा धेरै बढ्दा विकास बैंक उपसमूह २.३२ प्रतिशतले घटेको छ। साथै बैंकिङ, वित्त, बीमा, लघुवित्त लगायतका अधिकांश उपसमूहमा गिरावट देखिएको छ।