काठमाडौं — एसियाली विकास बैंक (एडिबी) ले आगामी वर्ष २०२५ मा नेपालको आर्थिक वृद्धिदर ४.४ प्रतिशत रहने अनुमान गरेको छ। बुधबार सार्वजनिक गरिएको 'एसियन डेभलपमेन्ट आउटलुक–२०२५' प्रतिवेदनमार्फत एडिबीले एसिया र प्रशान्त क्षेत्रका विभिन्न देशहरूको आर्थिक वृद्धि र मुद्रास्फीतिको प्रक्षेपण सार्वजनिक गरेको हो।

प्रक्षेपण अनुसार, सम्पूर्ण एसिया क्षेत्रको आर्थिक वृद्धिदर २०२५ मा ४.९ प्रतिशत रहनेछ भने २०२६ मा यसले केही घट्दै ४.७ प्रतिशतमा सीमित हुनेछ। मुद्रास्फीति दर पनि क्रमशः घट्दै २०२५ मा २.३ र २०२६ मा २.२ प्रतिशतमा झर्ने देखिएको छ।

नेपालको सन्दर्भमा भने सन् २०२५ मा मुद्रास्फीति ५.२ प्रतिशत र २०२६ मा ५ प्रतिशत रहने बताइएको छ। गत वर्ष असोजमा आएको बाढीपहिरोका कारण आपूर्ति प्रणालीमा परेको असरले मुद्रास्फीतिमा प्रत्यक्ष प्रभाव पारेको एडिबीको विश्लेषण छ।

एडिबीले अमेरिका र चीनबीचको भन्सार नीतिका कारण व्यापारिक अनिश्चितता बढ्दै गएको उल्लेख गर्दै त्यसले एसिया-प्यासिफिक क्षेत्रको आर्थिक वृद्धिमा दबाब सिर्जना गर्न सक्ने चेतावनी दिएको छ। अमेरिकी भन्सार नीतिमा सम्भावित परिवर्तन र त्यसको पूर्ण कार्यान्वयनले अन्तर्राष्ट्रिय व्यापारमा थप अस्थिरता ल्याउन सक्ने प्रतिवेदनको निष्कर्ष छ।

त्यस्तै, विस्तारमुखी वित्तीय नीतिका कारण मुद्रास्फीति बढ्न सक्ने सम्भावना पनि औंल्याइएको छ। साथै, युक्रेन-रुस युद्ध, मध्यपूर्वको अस्थिरता, आपूर्ति शृङ्खलामा अवरोध तथा खाद्य र ऊर्जा मूल्यवृद्धिले समग्र आर्थिक अवस्थालाई थप जोखिमपूर्ण बनाउने चेतावनीसमेत प्रतिवेदनमा उल्लेख गरिएको छ।

📈 आर्थिक वृद्धिदर (GDP Growth Rate)

💸 मुद्रास्फीति (Inflation Rate)