काठमाडौं – हिम स्टार उर्जा कम्पनी लिमिटेडले सर्वसाधारणका लागि प्राथमिक शेयर (आईपीओ) असार २४ गतेदेखि निष्काशन गर्ने भएको छ। कम्पनीले यसअघि आयोजना प्रभावित स्थानीयबासी र वैदेशिक रोजगारीमा रहेका नेपालीहरूका लागि आईपीओ निष्काशन गरी बाँडफाँट गरिसकेको हो।

कम्पनीको ३७ करोड ३० लाख रुपैयाँ जारी पूँजीको ३० प्रतिशत अर्थात ११ लाख १९ हजार कित्ता शेयर निष्काशन गरिने अनुमति पाइएको थियो। जसमध्ये १ लाख ८६ हजार ५०० कित्ता आयोजना प्रभावित क्षेत्रका बासिन्दाका लागि र ९३ हजार २५० कित्ता वैदेशिक रोजगारीमा रहेका नेपालीहरूका लागि बाँडफाँट भइसकेको छ।

अब कम्पनीले १८ हजार ६५० कित्ता कर्मचारीका लागि र ४६ हजार ६२५ कित्ता सामूहिक लगानी कोषका लागि छुट्याई बाँकी ७ लाख ७३ हजार ९७५ कित्ता शेयर सर्वसाधारणका लागि निष्काशन गर्न लागेको हो।

सर्वसाधारण लगानीकर्ताले न्यूनतम १० कित्ता र अधिकतम १० हजार कित्तासम्म आवेदन दिन सक्नेछन्। आवेदन छिटोमा असार २७ गते र ढिलोमा साउन ६ गतेसम्म दिन सकिनेछ।

कम्पनीलाई इक्रा नेपालले इक्रा एनपी इस्यूअर रेटिङ डबल बी माइनस प्रदान गरेको छ, जसले औसत जोखिम संकेत गर्छ। हिम स्टारले सञ्चालन गरेको ५ मेगावाट क्षमताको बुकु कापटी खोला जलविद्युत आयोजना निर्माण गरिरहेको छ, जसको कुल लागत १ अर्ब २३ करोड ८५ लाख रुपैयाँ रहेको छ।

आयोजनाको साधारण लगानी फिर्ता हुने अवधि ७.१४ वर्ष र छुटमा फिर्ता हुने अवधि ११.७५ वर्ष रहेको छ। कम्पनीको शेयर निष्काशन तथा बिक्री प्रबन्धक एनआईसी एशिया क्यापिटल लिमिटेड रहेको छ।