काठमाडौं । नेपालका वाणिज्य बैंकहरूले प्रवाह गर्ने शेयर धितो कर्जा (मार्जिन प्रकृतिको कर्जा) उल्लेख्य रूपमा बढेको छ। चालु आर्थिक वर्षको माघ मसान्तसम्म यस्तो कर्जा गत वर्षको सोही अवधिको तुलनामा ४२.९० प्रतिशतले वृद्धि भएको हो।

गत वर्ष माघसम्म ९३ अर्ब १२ करोड ४९ लाख रुपैयाँ रहेको यस्तो कर्जा यस वर्ष १ खर्ब ३३ अर्ब ७ करोड ६५ लाख रुपैयाँ पुगेको छ। कुल १९ वटा वाणिज्य बैंकहरूको तथ्यांक अनुसार समग्रमा ४२ अर्ब रुपैयाँभन्दा बढीले लगानी विस्तार भएको देखिन्छ।

शेयर धितो कर्जा प्रवाहमा नबिल बैंक अग्रस्थानमा रहेको छ। नबिलले माघ मसान्तसम्म १७ अर्ब ५० करोड ३३ लाख रुपैयाँ कर्जा प्रवाह गरेको छ, जुन अघिल्लो वर्षको तुलनामा ३५.०६ प्रतिशतले बढी हो। दोस्रो स्थानमा रहेको ग्लोबल आइएमई बैंक ले १३ अर्ब ३९ करोड ६९ लाख रुपैयाँ कर्जा प्रवाह गरेको छ। कुमारी बैंक १० अर्ब ५९ करोड ३४ लाख र प्राइम कमर्शियल बैंक ९ अर्ब ७९ करोड ३१ लाख रुपैयाँसहित क्रमशः तेस्रो र चौथो स्थानमा छन्। प्राइम बैंकको कर्जा विस्तार ४९.३९ प्रतिशतले बढेको छ।

वृद्धिदरका आधारमा भने कृषि विकास बैंक अगाडि देखिएको छ। यस बैंकको कर्जा प्रवाह २८६.३० प्रतिशतले बढेर ७ अर्ब ८७ करोड ७३ लाख रुपैयाँ पुगेको छ। अघिल्लो वर्ष यही अवधिमा २ अर्ब ३ करोड ९१ लाख रुपैयाँ मात्र कर्जा प्रवाह गरेको थियो।

त्यसैगरी माछापुच्छ्रे बैंक को १८१.०९ प्रतिशत, लक्ष्मी सनराइज बैंक को ११५.३ प्रतिशत, एनएमबि बैंक को ८७.२५ प्रतिशत वृद्धि भएको छ। एनआइसी एशिया बैंक को ८६.०३ प्रतिशत र सानिमा बैंक को ८१.८ प्रतिशतले कर्जा विस्तार भएको छ।

यद्यपि सबै बैंकमा वृद्धि देखिँदा नेपाल बैंक लिमिटेड को कर्जा १०.२७ प्रतिशतले घटेर ६ अर्ब ९३ करोड २८ लाख रुपैयाँमा सीमित भएको छ भने सिटिजन्स बैंक इन्टरनेसनल को कर्जा ३.९५ प्रतिशतले घटेर ५ अर्ब ९० करोड ९२ लाख रुपैयाँमा झरेको छ।

अन्य बैंकहरूमा सिद्धार्थ बैंक ले ८ अर्ब ९३ करोड, राष्ट्रिय वाणिज्य बैंक ले ८ अर्ब ९ करोड, प्रभु बैंक ले ६ अर्ब ६३ करोड र एभरेष्ट बैंक ले ४ अर्ब ३८ करोड रुपैयाँ शेयर धितो कर्जामा लगानी गरेका छन्। साथै नेपाल इन्भेष्टमेन्ट मेगा बैंक को ४ अर्ब २ करोड, हिमालयन बैंक को ३ अर्ब ३४ करोड र नेपाल एसबिआई बैंक को ५९ करोड ६१ लाख रुपैयाँ लगानी रहेको छ।

समग्रमा स्ट्याण्डर्ड चार्टर्ड बैंक नेपाल बाहेकका १९ बैंकहरूले १ खर्ब ३३ अर्ब रुपैयाँभन्दा बढी रकम शेयर धितो कर्जाका रूपमा बजारमा प्रवाह गरेका छन्। यसले शेयर बजारमा बैंकहरूको कर्जा लगानी गर्ने उत्साह बढेको संकेत गरेको छ।