काठमाडौं — गत चैत १५ गते काठमाडौंको तीनकुनेमा भएको राजावादी आन्दोलनसँग सम्बन्धित मुद्दामा संलग्न ७ जनालाई थुनामा राख्ने र ३२ जनालाई धरौटीमा रिहा गर्ने काठमाडौं जिल्ला अदालतले आदेश दिएको छ। न्यायाधीश ध्रुवराज कार्कीको इजलासबाट बिहीबार राति करिब सवा १२ बजेतिर आदेश जारी भएको हो।

अदालतको आदेशपछि काठमाडौं प्रहरी परिसरले सोहीअनुसार कार्यान्वयन अघि बढाएको छ। आदेश लेखनमा सहभागी शाखा अधिकृत बालाजी प्रसाद पाण्डेका अनुसार, आदेश १५५ पृष्ठ लामो रहेको छ। धेरै प्रतिवादी र एउटै मुद्दा भएकाले आदेश लेख्न समय लागेको उनले जानकारी दिए।

तीनकुने घटनामा संलग्न राप्रपाका सांसद धवल शमशेर जबरा र वरिष्ठ उपाध्यक्ष रवीन्द्र मिश्रबारे भने आदेशमा केही उल्लेख गरिएको छैन। अदालतमा उपस्थित नभएको भन्दै उनीहरूलाई फरार प्रतिवादीको सूचीमा राखिएको छ। अदालतले पहिल्यै उनीहरूका लागि पक्राउ पूर्जी जारी गरिसकेको छ।

साँझ ५ बजेतिर थुनछेक बहस सकिए पनि आदेश सार्वजनिक राति मात्रै भएको थियो। आदेश आउनुअघि अदालत परिसरमा दुर्गा प्रसाईंका समर्थक, आफन्त, प्रहरी र सञ्चारकर्मीको भिड लागेको थियो। भारतबाट पक्राउ परेका प्रसाईंसहित ७ जनालाई पुर्पक्षका लागि थुनामा पठाइएको छ।