काठमाडौं । बैंकिङ प्रणालीमा पर्याप्त तरलता कायम रहेपछि वाणिज्य बैंकहरूले भदौ महिनाका लागि निक्षेपको ब्याजदर थप घटाएका छन्। सञ्चालनमा रहेका २० वटा वाणिज्य बैंकले सार्वजनिक गरेको नयाँ ब्याजदरअनुसार साउनको तुलनामा भदौमा व्यक्तिगत तथा संस्थागत मुद्दती निक्षेपको औसत अधिकतम ब्याजदर घटेको हो।

भदौका लागि व्यक्तिगत मुद्दती निक्षेपको औसत अधिकतम ब्याजदर ४.१३६ प्रतिशत कायम भएको छ। साउनमा यस्तो दर औसत ४.१६७५ प्रतिशत थियो। यसअनुसार व्यक्तिगत निक्षेपको औसत अधिकतम ब्याजदर ०.०३१५ प्रतिशतविन्दुले घटेको छ।

त्यस्तै, संस्थागत मुद्दती निक्षेपको औसत अधिकतम ब्याजदर पनि ३.११६ प्रतिशतबाट घटेर भदौमा ३.०८१ प्रतिशतमा झरेको छ। संस्थागत निक्षेपको औसत दर ०.०३५ प्रतिशतविन्दुले घटेको हो।

२० वाणिज्य बैंकमध्ये पाँचवटाले व्यक्तिगत मुद्दती निक्षेपको ब्याजदर घटाएका छन् भने १५ वटा बैंकले साउनकै दरलाई निरन्तरता दिएका छन्। व्यक्तिगततर्फ ब्याजदर घटाउने बैंकमा नेपाल बैंक, सिटिजन्स बैंक इन्टरनेसनल, स्ट्यान्डर्ड चार्टर्ड बैंक, कुमारी बैंक र सिद्धार्थ बैंक रहेका छन्।

संस्थागत निक्षेपतर्फ भने नेपाल बैंक र सिद्धार्थ बैंकले मात्र ब्याजदर घटाएका छन्। बाँकी बैंकले साउनकै ब्याजदरलाई भदौमा पनि निरन्तरता दिएका छन्।

भदौका लागि सबैभन्दा ठूलो कटौती सिद्धार्थ बैंकले गरेको छ। बैंकले व्यक्तिगत मुद्दती निक्षेपको अधिकतम ब्याजदर ४.०५ प्रतिशतबाट ३.७६ प्रतिशतमा झारेको छ। यसमा ०.२९ प्रतिशतविन्दुको कमी आएको हो। संस्थागत निक्षेपको ब्याजदर पनि ३.२५ प्रतिशतबाट घटाएर ३.०५ प्रतिशत कायम गरिएको छ।

नेपाल बैंकले व्यक्तिगत निक्षेपको ब्याजदर ४.२५ प्रतिशतबाट घटाएर ४.१५ प्रतिशत कायम गरेको छ। त्यस्तै, संस्थागत निक्षेपको ब्याजदर ४ प्रतिशतबाट ३.५० प्रतिशतमा झारिएको छ।

अन्य बैंकमध्ये सिटिजन्स बैंक इन्टरनेसनलले व्यक्तिगत मुद्दती निक्षेपको अधिकतम ब्याजदर ३.९५ प्रतिशतबाट घटाएर ३.८५ प्रतिशत कायम गरेको छ। स्ट्यान्डर्ड चार्टर्ड बैंकले ३.८५ प्रतिशतबाट घटाएर ३.८० प्रतिशत तथा कुमारी बैंकले ३.८५ प्रतिशतबाट घटाएर ३.७६ प्रतिशत कायम गरेका छन्।

भदौमा व्यक्तिगत निक्षेपतर्फ सबैभन्दा बढी ४.५५ प्रतिशत ब्याजदर नबिल बैंक र प्रभु बैंकले कायम गरेका छन्। नेपाल इन्भेस्टमेन्ट मेगा बैंक, एनएमबी बैंक, सानिमा बैंक र माछापुच्छ्रे बैंकले ४.५० प्रतिशत ब्याजदर कायम गरेका छन्।

भदौका लागि वाणिज्य बैंकहरूको अधिकतम निक्षेप ब्याजदर