न्युयोर्क। अमेरिकामा आयोजित संयुक्त राष्ट्रसंघको ७९औँ महासभामा सहभागी हुन गएका नेपालका प्रधानमन्त्री केपी शर्मा ओली र भारतका प्रधानमन्त्री नरेन्द्र मोदीबीच न्यूयोर्कमा औपचारिक भेटवार्ता सम्पन्न भएको छ। न्यूयोर्कको स्थानीय समयअनुसार असोज ६ गते साँझ ५:३० बजे दुई नेताबीच भेट भएको हो।

प्रधानमन्त्री ओली नेपाली प्रतिनिधिमण्डलको नेतृत्व गर्दै महासभामा भाग लिन पुगेका हुन्, भने भारतीय प्रधानमन्त्री मोदी पनि भारतको प्रतिनिधिमण्डलको नेतृत्व गर्दै संयुक्त राष्ट्रसंघीय कार्यक्रमका लागि न्यूयोर्कमा छन्। भेटमा दुवै मुलुकका विदेशमन्त्रीहरू र उच्च अधिकारीहरू समेत सहभागी थिए।

यो भेटवार्ता प्रधानमन्त्री ओली प्रधानमन्त्री पदमा निर्वाचित भएपछि नेपाल र भारतका प्रधानमन्त्रीबीचको पहिलो उच्चस्तरीय भेट हो। दुई नेताबीच नेपाल–भारत सम्बन्धलाई अझ प्रगाढ बनाउने, सीमापार व्यापार तथा आर्थिक सहयोग विस्तार गर्ने विषयमा छलफल भएको जनाइएको छ। साथै, जलविद्युत् परियोजनामा संयुक्त साझेदारी, सीमासम्बन्धी समस्याहरूको समाधान, र अन्य द्विपक्षीय मुद्दाहरूमा सहकार्यका उपायहरू पनि छलफलको केन्द्रमा रहेको बताइएको छ।

प्रधानमन्त्री ओली र मोदीबीचको यो भेटलाई नेपाल–भारत सम्बन्धको सुदृढीकरणको लागि महत्त्वपूर्ण मानिएको छ। दुवै नेताले दुई देशबीचको ऐतिहासिक सम्बन्धलाई अगाडि बढाउँदै नयाँ साझेदारीका मोडेलहरू विकास गर्ने प्रतिबद्धता जनाएका छन्।

नेपाल र भारतबीचका पछिल्ला घटनाक्रमहरूलाई ध्यानमा राख्दै, यो भेटले द्विपक्षीय सम्बन्धलाई नयाँ उचाइमा पुर्‍याउने अपेक्षा गरिएको छ। नेपाल र भारतबीचको व्यापार, भौतिक पूर्वाधार विकास, र पारवहनमा रहेका अवरोधहरूलाई हटाउनको लागि दुई देशका प्रधानमन्त्रीहरूले नजिकबाट सहकार्य गर्ने योजना बनाएको समाचार स्रोतले बताएको छ।