काठमाडौं– राजस्व अनुसन्धान विभागले झुट्टा तथा नक्कली मूल्य अभिवृद्धि कर विजक प्रयोग गरी राजस्व छली गरेको आरोपमा सवा अर्ब रुपैयाँ भन्दा बढीको बिगो दाबी गर्दै मुद्दा दायर गरेको छ । विभागले एक अर्ब ३४ करोड ९५ लाख विगो असुल गरी जरिवाना र कैद सजायको माग दाबी गर्दै पाटन उच्च अदालतमा दुई वटा मुद्दा दायर गरेको छ ।

न्यू सपयत्री इन्टरप्राइजेजका सञ्चालकले आर्थिक अवस्था कमजोर भएका मजदुर लगायतका व्यक्तिको नाममा कम्पनी दर्ता गरी नक्कली बिजक बिक्री गदै आएको भेटिएको छ । न्यू सयपत्री इन्टरप्राइजेजका सञ्चालक विवेक मगर, मनिष कुमार सहित २८ जना विरुद्ध एक अर्ब २२ करोड २० लाख १९ हजार रुपैयाँको बिगो दाबी गरिएको छ ।

आर्थिक वर्ष ०७१÷७२देखि ०७३÷७४सम्म मूल्य अभिवृद्धि कर तथा आयकर राजस्व चुहावट गरेकोले राजस्व चुहावट(अनुसन्धान तथा नियन्त्रण) ऐन,२०५२को दफा ३ले निषेधित कार्य गरेको विभागले जनाएको छ । मूल्य अभिवृद्धि दरतर्फ ३७ करोड ३६ लाख ६३ हजार, आयकर तर्फ ८४ करोड २९ लाख आठ हजार, लाभांश करतर्फ ५४ लाख ४७ हजार रुपैयाँ राजस्व चुहावट गरेको विभागको ठहर छ ।
त्यसैगरी,जेनेरल सप्लायर्स प्रालिका सञ्चालक सुवोध शाहबाट १२ करोड ७५ लाख ५१ हजार हजार रुप्ैयाँ विगो असुल गरी जरिवाना र कैद सजाय माग दाबी गरी मुद्दा दायर गरेको छ । साहारा एण्ड खातुन ट्रेडर्सले मूल्य अभिवृद्धिकरतर्फ चार करोड ५१ लाख २७ हजार, आय कर सात करोड १८ लाख ६६ लाख र लाभांश कर तर्फ एक करोड पाँच लाख राजस्व चुहावट गरेको विभागले जनाएको छ ।