काठमाडौं । चालु आर्थिक वर्षको पहिलो पाँच महिनामा मुलुकको व्यापार घाटा साढे ६ खर्ब रुपैयाँ नाघेको छ। भन्सार विभागले सार्वजनिक गरेको साउनदेखि मंसिर मसान्तसम्मको तथ्यांकअनुसार यस अवधिमा व्यापार घाटा ६ खर्ब ४९ अर्ब ६८ करोड रुपैयाँ पुगेको छ। यो अघिल्लो आर्थिक वर्षको यही अवधिको तुलनामा १०.५२ प्रतिशतले बढी हो। अघिल्लो वर्ष सोही अवधिमा व्यापार घाटा ५ खर्ब ८७ अर्ब ८२ करोड ८८ लाख रुपैयाँ रहेको थियो।

विभागका अनुसार चालु आर्थिक वर्षको मंसिरसम्म नेपालको कुल वैदेशिक व्यापार ८ खर्ब ८२ अर्ब ६९ करोड ८२ लाख रुपैयाँ पुगेको छ। यो अघिल्लो वर्षको यही अवधिको तुलनामा २०.०७ प्रतिशतले वृद्धि भएको हो। अघिल्लो आर्थिक वर्षको सोही अवधिमा कुल वैदेशिक व्यापार ७ खर्ब ३५ अर्ब १४ करोड ८३ लाख रुपैयाँ बराबरको रहेको थियो।

यस अवधिमा आयात र निर्यात दुवै बढेका छन्। साउनदेखि मंसिरसम्म आयात १५.८३ प्रतिशतले वृद्धि भएको छ भने निर्यातमा ५८.१७ प्रतिशतको उल्लेखनीय वृद्धि देखिएको छ। मंसिर मसान्तसम्म नेपालले कुल ७ खर्ब ६६ अर्ब १८ करोड ९१ लाख रुपैयाँ बराबरको वस्तु आयात गरेको छ। अघिल्लो वर्षको यही अवधिमा आयात ६ खर्ब ६१ अर्ब ४८ करोड ८५ लाख रुपैयाँ रहेको थियो।

त्यस्तै, चालु आर्थिक वर्षको मंसिरसम्म नेपालबाट १ खर्ब १६ अर्ब ५० करोड ९० लाख रुपैयाँ बराबरको वस्तु निर्यात भएको छ। अघिल्लो वर्षको सोही अवधिमा निर्यात ७३ अर्ब ६५ करोड ९७ लाख ७१ हजार रुपैयाँमा सीमित थियो। यसअनुसार नेपालको कुल वैदेशिक व्यापारमा निर्यातको हिस्सा १३.२० प्रतिशत र आयातको हिस्सा ८६.८० प्रतिशत रहेको छ।