सञ्चार क्षेत्रलाई सेवामुलक उद्योगको दर्जा दिई सोहि अनुसारको महसुल दर कायम गर्नु पर्ने भन्दै रेडियोहरुको छात्रा संस्था ब्रोडकाष्टिङ एसोसिएसनअफ नेपाल (वान)ले उर्जा मन्त्री वर्षमान पुन लाई ज्ञापन पत्र बुझाएको छ ।

केहि दिन अघि मन्त्री पुन,विद्युत प्राधिकरणका कार्यकारी निर्देशक कुलमान घिसिङ, ब्रोडकाष्टिङ एसोसिएसनअफ नेपाल (वान)का अध्यक्ष चन्द्र्र न्यौपाने, नेपाल टेलिभिजनका अध्यक्ष महेन्द्र विष्ट,नेपाल टेलिभिजनका महाप्रवन्धक सचिन रोका र ब्रोडकाष्टिङ एसोसिएसनअफ नेपाल (वान)का कार्यालय सचिव कृष्ण आचर्या विच उर्जा मन्त्रालयमा महसुलको विषयलाई दिएर छलफल समेत भएको थियो । सोहि छलफल अनुसार आग्रह सहितको आधिकारीक पत्र मन्त्रालयमा दर्ता गरिएको हो ।

छलफलमा सहभागी भए पछि पिपुल खवरसँग कुरा गर्दै वानका अध्यक्ष चन्द्र न्यौपानेले मिडियाका माग प्रति मन्त्री पुन र कार्यकारी निर्देशक कुलमान घिसिङ अत्यन्तै सकारात्मक भएको जानकारी दिनु भयो । साथै उहाँले रेडियोले खेलेको भुमिका प्रति पनि मन्त्री पुनले खुलेर प्रसंशा गरेको जानकारी दिनु भयो । अध्यक्ष न्यौपानेले मिडियालाई कम्तीमा पनि सेवामुलक उद्योगको क्याटोगोरी भित्र राख्नु पर्ने माग गरेको बताउनु भयो ।

अहिले रेडियोलाई घरायसी प्रयोजनमा राखिएको छ । जस अनुसार जति धेरै विद्युत खवप त्यहि अनुसारको महसुल बुझाउनु पर्ने प्रावधान छ । विद्युत प्राधिकरणले अहिले नयाँ महसुल दर लागु गर्न विद्युत नियमन आयोग मार्फत काम गरिरहेको छ । संस्था संगको छलफल र ज्ञापन पत्र पछि मन्त्रालय मिडियालाई सेवामुलक उद्योग भित्र राख्न सकारात्मक भएको न्यौपानेले जानकारी दिनु भयो ।

अहिले रेडियोहरुले प्रति युनिट १४ रुपैयाका दरले महसुल बुझाइ रहेको छन । यदि सेवा मुलक क्षेत्र भित्र समावेस गरियो भने यो दर आधा भन्दा धेरै घट्ने छ । सरकारले मिडियालाई उद्योगको दर्जा समेत दिएको छैन ।