काठमाडौं — सरकारले १० अर्ब रुपैयाँ बराबरको आन्तरिक ऋण उठाउने तयारी गरेको छ। सार्वजनिक ऋण व्यवस्थापन कार्यालयले बुधबार यो रकम बराबरको सार्वजनिक ऋण उठाउन सूचना जारी गरेको हो।

सरकारले "विकास ऋणपत्र २०८७" नामको ऋणपत्र मार्फत ६ वर्ष अवधिका लागि आन्तरिक ऋण लिनेछ। यस ऋणमा बैंक तथा वित्तीय संस्था, गैरबैंक वित्तीय संस्था, बीमा कम्पनी, अन्य संगठित संस्था तथा नेपाली नागरिकले लगानी गर्न सक्नेछन्।

ऋणको ब्याजदर बोलकबोलका आधारमा निर्धारण हुनेछ, र इच्छुकहरूले बुधबार बिहान १० बजेदेखि दिउँसो २ बजेसम्म कार्यालयको अनलाइन प्रणालीमार्फत कबोल पेश गर्न सक्नेछन्। बिहीबार ऋणपत्रको निष्काशन हुनेछ, र यसमा ६–६ महिनामा ब्याज भुक्तानी गरिनेछ भने ६ वर्षपछि, २०८७ कात्तिक २९ मा सावाँ भुक्तानी गरिनेछ।

ऋणपत्र धितोमा राखेर कर्जा लिन पाउने व्यवस्था गरिएको छ, साथै यो धितोपत्र दोस्रो बजारमा किनबेच गर्न पनि मिल्नेछ। यस ऋणमध्ये साढे ८ अर्ब प्रतिस्पर्धी बोलदातालाई र डेढ अर्ब अप्रतिस्पर्धी बोलदातालाई छुट्याइएको छ। इच्छुक संस्था तथा नागरिकले न्यूनतम ५ लाखदेखि अधिकतम कुल निष्काशित रकमको सीमा पुर्याएर ऋणपत्र खरिद गर्न पाउनेछन्।

चालु आर्थिक वर्षमा हालसम्म सरकारले १ खर्ब ३९ अर्ब बराबरको आन्तरिक ऋण लिइसकेको छ, जसमा ८० अर्ब विकास ऋणपत्र र ४९ अर्ब ट्रेजरी बिल्स समावेश छन्। यस आवमा सरकारको आन्तरिक ऋण लिने लक्ष्य ३ खर्ब ३० अर्ब रहेको छ, र बुधबार जारी हुने ऋणसहित यो रकम १ खर्ब ४९ अर्ब पुग्नेछ।