नेपालले पछिल्ला आठ महिनामा झण्डै ५६ अर्ब रुपैयाँ बराबरको खानेतेल निर्यात गरेको छ। विदेशबाट कच्चा पदार्थ आयात गरी प्रशोधनपछि मूल्य अभिवृद्धि गरेर बिक्री गर्दा खानेतेल निर्यातमा उल्लेखनीय वृद्धि भएको देखिएको छ। भन्सार विभागका अनुसार चालु आर्थिक वर्षको फागुन मसान्तसम्मको वैदेशिक व्यापार तथ्यांकअनुसार गत वर्षको तुलनामा यस वर्ष निर्यात ५७.२० प्रतिशतले बढेको छ।

सो अवधिमा नेपालले एक खर्ब ५८ अर्ब रुपैयाँको निर्यात गर्दा ४७ अर्ब ९४ करोड रुपैयाँ बराबरको सोयाबिन तेल मात्रै निर्यात भएको छ। त्यस्तै, सात अर्ब ९८ करोड रुपैयाँ बराबरको सूर्यमुखी तेल, पाँच अर्ब ८३ करोड रुपैयाँको अलैंची, र चार अर्ब ३२ करोड रुपैयाँ बराबरको कार्पेट निर्यात भएको छ।

व्यापार घाटाको अवस्थालाई हेर्दा, चालु आवको दोस्रो चौमासिकसम्म नेपालले १३ खर्ब तीन अर्ब रुपैयाँ बराबरको वैदेशिक व्यापार गर्दा नौ खर्ब ८७ अर्ब रुपैयाँ बराबरको घाटा व्यहोरेको छ। पछिल्लो आठ महिनामा नेपालले ११ खर्ब ४५ अर्ब रुपैयाँ बराबरको आयात र एक खर्ब ५८ अर्ब रुपैयाँ बराबरको निर्यात गरेको छ।

भारतसँग मात्रै नेपालले पाँच खर्ब ६३ अर्ब रुपैयाँको व्यापार घाटा बेहोरेको छ। साउनदेखि फागुनसम्म भारतबाट छ खर्ब ८८ अर्ब रुपैयाँ बराबरको आयात हुँदा एक खर्ब २५ अर्ब रुपैयाँ बराबरको निर्यात भएको छ। चीनसँगको व्यापारमा पनि ठूलो असन्तुलन देखिन्छ, जसमा नेपालले दुई खर्ब १९ अर्ब रुपैयाँ बराबरको आयात गर्दा दुई अर्ब १२ करोड रुपैयाँ बराबरको मात्र निर्यात गरेको छ।

नेपालले पछिल्लो आठ महिनामा पेट्रोलियम पदार्थको उच्च आयात गरेको छ, जसमा ७८ अर्ब ८६ करोड रुपैयाँ बराबरको डिजेल, ४२ अर्ब ८० करोड रुपैयाँ बराबरको पेट्रोल, र ४१ अर्ब रुपैयाँ बराबरको एलपी ग्यास आयात गरिएको छ। साथै, ९ अर्ब ६९ करोड रुपैयाँ बराबरको विद्युतीय सवारीसाधन र २१ अर्ब ९१ करोड रुपैयाँ बराबरको स्मार्टफोन आयात भएको छ।