काठमाडौं । पहिरोका कारण बनेको तालबाट थप बाढीको जोखिम बढेपछि चीनले तिब्बतमा जारी उद्धार अभियान स्थगित गरेको छ। चिनियाँ राज्य सञ्चालित सञ्चारमाध्यमका अनुसार उद्धार टोलीलाई घटनास्थलबाट एक किलोमिटर टाढा सुरक्षित स्थानमा हट्न निर्देशन दिइएको छ।

तिब्बतको चीन–नेपाल सीमामा विनाशकारी पहिरो गएको दुई दिनपछि पनि सयौँ मानिस बेपत्ता रहेका छन्। पहिरोका कारण अत्यधिक माटो, लेदो तथा भग्नावशेष थुप्रिएर बनेको ताल भरिँदै गएपछि उद्धार टोली परिचालन भएको क्षेत्रमा पानी बग्न थालेको चिनियाँ सरकारी प्रसारक सीसीटीभीले जनाएको छ।

चीनले शुक्रबार उक्त क्षेत्रमा पुनः बाढी आउन सक्ने उच्च जोखिम रहेको भन्दै उद्धार कार्य तत्कालका लागि रोकेको हो। सीसीटीभीका अनुसार सबै उद्धार टोलीलाई सुरक्षित स्थानमा तयारी अवस्थामा रहन र थप निर्देशनको प्रतीक्षा गर्न भनिएको छ।

यसअघि घटनास्थलमा पुगेका आपत्कालीन टोलीलाई समेत एक किलोमिटर पछाडि हट्न निर्देशन दिइएको थियो। बुधबार तिब्बतको सीमावर्ती केन्द्र केरुङमा माटो र भग्नावशेषसहितको ठूलो पहिरो खसेपछि उक्त ताल बनेको हो। पहिरोमा परी सयौँ मानिस बेपत्ता भएको बताइएको छ।

निरन्तर वर्षा भइरहेकाले आगामी तीन दिनसम्म तालको जलस्तर बढ्ने र सेप्टेम्बर १ आसपास उच्च बिन्दुमा पुग्ने अनुमान गरिएको छ। ताल फुटेमा तल्लो तटीय क्षेत्रमा ठूलो बाढी आउन सक्ने जोखिम रहेको चिनियाँ सरकारी सञ्चारमाध्यमले जनाएका छन्। यसबाट केरुङ बन्दरगाहसहित तल्लो तटीय क्षेत्रमा थप क्षति पुग्न सक्ने सम्भावना छ।

आपत्कालीन इन्जिनियरिङ टोलीले तालको अवस्था निरन्तर निगरानी गरिरहेको छ। शुक्रबारसम्म प्रकोप प्रभावित क्षेत्रबाट ४९९ चिनियाँ नागरिक र ५५५ जना विदेशीलाई सुरक्षित स्थानमा सारिएको सीसीटीभीले जनाएको छ।

बेपत्ता व्यक्तिहरूको खोजीका लागि उद्धारकर्मीहरूले ड्रोनमार्फत थ्रीडी मोडलिङ, थर्मल इमेजिङ तथा प्रत्यक्ष खोजी प्रविधि प्रयोग गरिरहेका छन्।