काठमाडौं – नेपाल राष्ट्र बैंकका गभर्नर डा. विश्वनाथ पौडेलले आफ्नो सम्पत्ति विवरण सार्वजनिक गरेका छन्। २०८२ जेठ ६ गते गभर्नर पदमा नियुक्त भएका पौडेलले हाइड्रोपावर तथा बैंकको सेयरमा उल्लेख्य लगानी रहेको, साथै घर-जग्गा, सुन, हिरा र बैंक खातामा लाखौँ रुपैयाँ रहेको विवरण सार्वजनिक गरेका हुन्।

उनको ललितपुरको भैंसेपाटीस्थित सैंबुमा पाँच आना दुई दाम क्षेत्रफलमा बनेको २७९५ वर्गफिटको घर र नवलपरासीको गैंडाकोटामा दुई कित्ता जग्गा र २५०० वर्गफिटको घर रहेको उल्लेख छ। यी सम्पत्ति श्रीमती प्रतिभा शर्माको नाममा छन्। ललितपुरको सम्पत्ति १ करोड ५५ लाख रुपैयाँ र गैंडाकोटाको ६० लाख रुपैयाँ मूल्यमा खरिद गरिएको हो।

पौडेलसँग ४५ तोला सुन र १५ लाख रुपैयाँ मूल्यको हिराका गहना छन्। उनी र उनकी श्रीमतीको नाममा रहेको बैंक खातामा विभिन्न बैंकमा नगद मौज्दातसमेत उल्लेख गरिएको छ। उनले सानिमा ग्रुप अन्तर्गतका बैंक र हाइड्रोपावर कम्पनीहरूमा संस्थापक सेयरको रूपमा ठूलो लगानी गरेका छन्।