काठमाण्डौ – शिव शंकर हाइड्रो इन्भेष्टमेन्ट लिमिटेडले आगामी आईपीओ निष्काशनका लागि बिक्री प्रबन्धकको रुपमा लक्ष्मी सनराइज क्यापिटललाई चयन गरेको छ। यस सम्बन्धी सम्झौतामा लक्ष्मी सनराइज क्यापिटलका सीईओ विजय लाल श्रेष्ठ र शिव शंकर हाइड्रोका अध्यक्ष खगेश्वर बोहोराले हस्ताक्षर गरेका छन्।

कम्पनीले २५ करोड रुपैयाँ बराबरका २५ लाख कित्ता शेयर सार्वजनिक निष्काशन गर्ने तयारी गरिरहेको छ।

शिव शंकर इन्भेष्टमेन्ट प्रा. लि. र जय गणेश इन्भेष्टमेन्ट प्रा. लि. गाभिएर स्थापना भएको यो कम्पनीले मुख्यतया जलविद्युत्, पूर्वाधार निर्माण, र अन्य उत्पादनशील क्षेत्रमा लगानी गर्दै आएको छ।

हाल कम्पनीले सानिगार्ड हाइड्रो लिमिटेड (३८.४६ मेगावाट), कलंगा हाइड्रो लिमिटेड (१५.३३ मेगावाट), बुङ्गल हाइड्रो लिमिटेड (१०.७ मेगावाट), र भिजन इनर्जी एण्ड पावर लिमिटेड (५७.५ मेगावाट) जस्ता जलविद्युत् परियोजनाहरूमा लगानी गरिरहेको छ।

शिव शंकर हाइड्रो इन्भेष्टमेन्ट लिमिटेडले जलविद्युत् परियोजनामा मात्र नभई पूर्वाधार विकास र अन्य उत्पादनशील क्षेत्रमा आफ्नो लगानीलाई विस्तार गर्ने योजना बनाएको छ। आगामी आईपीओबाट संकलित रकमले थप परियोजनाहरूमा लगानी गर्दै कम्पनीको दायरा विस्तार गर्ने उद्देश्य रहेको छ।

यो आईपीओ निष्काशनले सर्वसाधारण लगानीकर्तालाई जलविद्युत् क्षेत्रमा सहभागी हुन अवसर प्रदान गर्ने विश्वास कम्पनीले लिएको छ। बिक्री प्रबन्धक लक्ष्मी सनराइज क्यापिटलले निष्काशन प्रक्रियालाई छिटो र प्रभावकारी रूपमा सम्पन्न गर्ने बताएको छ।