काठमाडौं — औद्योगिक क्षेत्रमा लोडसेडिङ हटेसँगै निर्माण सामग्रीको मूल्यमा गिरावट आएको छ। भारतबाट नियमित रूपमा विद्युत् आपूर्ति सुरु भएसँगै नेपाल विद्युत् प्राधिकरणले चैत १५ गतेदेखि औद्योगिक क्षेत्रका लागि लोडसेडिङ पूर्ण रूपमा हटाएपछि स्टिल र सिमेन्ट उद्योगहरूले मूल्य समायोजन गरेका हुन्।

नेपाल स्टिल उत्पादक संघका अध्यक्ष शोभाकर (हरि) न्यौपानेका अनुसार लोडसेडिङ हटेसँगै स्टिलको मूल्य प्रतिकेजी ४ रुपैयाँले घटाइएको छ। “दैनिक १२ देखि १४ घन्टासम्मको लोडसेडिङका कारण लागत बढेको थियो,” उनले भने, “अहिले विद्युत् नियमित हुँदै गएको छ, त्यसैले मूल्य घटाएका हौं।” उनका अनुसार पूर्ण रूपमा बिजुली आपूर्ति हुन थालेपछि अझै ५ रुपैयाँ ३३ पैसासम्म मूल्य घटाउने तयारी उद्योगले गरिरहेको छ। हाल स्टिलको मूल्य प्रतिकेजी ८४–८५ रुपैयाँको हाराहारीमा रहेको छ, उद्योग अनुसार केही फरक पर्न सक्छ।

त्यस्तै, नेपाल सिमेन्ट उत्पादक संघले पनि सिमेन्टको मूल्य बोरामा २५ रुपैयाँसम्म घटाइएको जनाएको छ। नियमित विद्युत् आपूर्तिका कारण उत्पादन लागतमा आएको कमीले मूल्य घटाउन सकिएको उद्योगीहरू बताउँछन्।

उद्योगहरूका अनुसार लोडसेडिङकै कारण निर्माणजन्य सामग्रीको मूल्य अघिल्लो समय उल्लेखनीय रूपमा बढेको थियो। त्यसले निर्माणको सिजनमा बजारमा व्यापक आलोचना र सरकारमाथि दबाब सिर्जना गरेको थियो। तर, कच्चा पदार्थको लागत र डलर विनिमय दर यथावत् रहेका कारण मूल्य अझै पूर्ण रूपमा घटाउन नसकिएको उद्योगीहरूको भनाइ छ।