यसरी हुँदैछ सरकारको स्मार्ट लकडाउनको तयारी

काठमाडौं–सरकारले स्मार्ट लकडाउनको तयारी गरेको छ। कोभिड–१९ संकट व्यवस्थापन केन्द्र (सीसीएमसी) ले शुक्रबारको निर्देशक समितिको बैठकमा स्मार्ट लकडाउन प्रस्ताव गरेको हो। प्रधानमन्त्री शेरबहादुर देउवाको अध्यक्षता निर्देशक समिति बैठक बसेको थियो। 

‘जहाँ संक्रमण बढी छ, सम्बन्धित जिल्ला वा स्थानीय तहले नै लकडाउन गर्न सक्ने अवधारणाको प्रस्ताव सीसीएमसीले गरेको छ’, सीसीएमसीका प्रवक्ता नुरहरि खतिवडाले भने। वैज्ञानिक र व्यावहारिक हुने गरी लकडाउन गर्ने अवधारणा नै स्मार्ट लकडाउन रहेको उनले स्पष्ट पारे।

भाइरस संक्रमणको जोखिम बढेपछि स्वास्थ्य मन्त्रालयले कोभिड संकट व्यवस्थापन केन्द्र निर्देशक समिति (सीसीएमसी)लाई स्मार्ट लकडाउन गर्न सिफारिस गरेको छ । स्वास्थ्य क्षेत्र हेर्ने तालुक मन्त्रालयबाटै यस्तो सुझाव आएपछि प्रधानमन्त्री अध्यक्ष रहेको सीसीएमसीले संक्रमणको जोखिमको आधारमा मुलुकलाई वर्गीकृत गरेर स्मार्ट लकडाउन गर्नेबारे छलफल थालेको छ ।


पछिल्लो साता काठमाडौं लगायत मुलुकको दैनिक संक्रमणदर २४ प्रतिशतभन्दा माथि छ । मृत्युदर र संक्रमण उकालो लागेको छ भने, सक्रिय संक्रमित संख्या पनि ४० हजारभन्दा माथि पुगेको छ ।

काठमाडौं उपत्यकामा निषेधाज्ञामा खुकुलो बनाएसँगै बजार, कार्यालय र पसलमा चहलपहल बढेको छ । मानिसहरु मास्क र सामाजिक दूरी बिनै भीडभाड गरिरहेको देख्न सकिन्छ । मुख्य बजारमा मानिसहरुको भीड देखिएपनि प्रशासनले भने अनुगमन गर्न सकेको छैन ।

काठमाडौं उपत्यकामा जारी निषेधाज्ञा साउन २० गते मध्यरातमा सकिँदैछ । संक्रमण दरमा वृद्धि भएपनि र स्वास्थ्य मन्त्रालयले स्मार्ट लकडाउनको प्रस्ताव गरेपनि निषेधाज्ञा लागू गर्ने अधिकार पाएका प्रमुख जिल्ला अधिकारीहरु भने मास्क र सामाजिक दूरीको अनुगमनलाई कडा तुल्याउँदै साविककै आदेशलाई कायम राखी निषेधाज्ञा थप गर्ने तयारीमा छन् ।

अहिलेसम्म हुँदै आएका लकडाउन  जिल्ला प्रशासन कार्यालयमार्फत नै गर्दै आएको भए पनि केन्द्रको नियन्त्रण रहँदै आएको छ। अब हुने लकडाउनमा जिल्लाले स्वयं अवस्था हेरेर निर्णय गर्न सक्छ। स्मार्ट लकडाउनको अवधारणाअनुसार जहाँ कोरोना संक्रमण बढ्छ, त्यहाँ लकडाउन हुन्छ, जहाँ घट्छ, खुला हुँदै जान्छ।अन्नपूर्ण पोष्टबाट
 

प्रतिक्रिया