काठमाडौं । अमेरिकाको मिनेसोटामा पाँच वर्षीय स्कुले बालकलाई अध्यागमन अधिकारीहरूले बुबासहित हिरासतमा लिएपछि ट्रम्प प्रशासनको आप्रवासन नीतिप्रति तीव्र आलोचना सुरु भएको छ। निलो टोपी लगाएको बालक आँसुले भरिएको आँखासहित नियन्त्रणमा रहेको तस्बिर सामाजिक सञ्जालमा भाइरल भएपछि घटनालाई अमानवीय व्यवहारको प्रतीकका रूपमा हेरिएको छ। आलोचकहरूले यसलाई आप्रवासीविरुद्धको कठोर नीतिको प्रत्यक्ष उदाहरण भनेका छन्।

जानकारी अनुसार अध्यागमन अधिकारीहरूले पाँच वर्षीय लियाम कोनेजो रामोस र उनका बुबालाई स्कुलबाट घर फर्कने क्रममा मिनेसोटामा पक्राउ गरी टेक्सासको डिलीस्थित हिरासत केन्द्रमा लगेका थिए। स्कुल प्रशासनका अनुसार अधिकारीहरूले बालकलाई परिवारका अन्य सदस्य वा स्कुलकै जिम्मामा नछोडी बुबासँगै लैजानु गम्भीर त्रुटि हो। स्कुलले बच्चालाई घरभित्र अरू कोही छ कि छैन भनी ढोका ढकढक्याउन लगाइएको घटनालाई ‘बालकलाई चाराको रूपमा प्रयोग गरिएको’ भन्दै आपत्ति जनाएको छ।

परिवारका वकिल र स्कुल प्रशासनले परिवार अवैध रूपमा अमेरिकामा बसेको दाबी अस्वीकार गरेका छन्। उनीहरू सन् २०२४ मा आधिकारिक प्रवेश बिन्दुबाट अमेरिका आएको र शरणको प्रक्रिया जारी रहेको जनाइएको छ। विपरीत रूपमा गृह सुरक्षा विभागले भने बालकको बुबा अवैध आप्रवासी भएको र पक्राउका क्रममा भाग्न खोजेकाले सुरक्षाका कारण बच्चालाई पनि साथमै राखिएको दाबी गरेको छ।

यस घटनाप्रति पूर्व उपराष्ट्रपति कमला ह्यारिससहित विभिन्न मानवअधिकार पक्षधरहरूले कडा प्रतिक्रिया जनाएका छन्। स्कुल बोर्डका पदाधिकारीहरूले बच्चालाई आफूसँगै छोड्न आग्रह गर्दा पनि अधिकारीहरूले अस्वीकार गरेको बताएका छन्। विश्लेषकहरूका अनुसार उक्त तस्बिरले ट्रम्प प्रशासन आप्रवासन नीतिमा कुनै नरमपन ल्याउन तयार छैन भन्ने संकेत दिएको छ।