काठमाडौं । बुङ्गल हाइड्रो लिमिटेडले आयोजना प्रभावित क्षेत्रका स्थानीय बासिन्दा तथा वैदेशिक रोजगारीमा रहेका नेपालीहरूका लागि आज (असार २९ गते) देखि प्रारम्भिक सार्वजनिक निष्कासन (आईपीओ) खुला गरेको छ।

कम्पनीले ८३ करोड रुपैयाँ जारी पूँजीको ३५ प्रतिशत, अर्थात् २९ करोड ५ लाख रुपैयाँ बराबरको २९ लाख ५ हजार कित्ता शेयर निष्कासनको अनुमति पाएको छ। यसमध्ये आयोजनाबाट प्रभावित क्षेत्रका स्थानीयबासिन्दाका लागि ८ लाख ३० हजार ८२४ कित्ता शेयर छुट्याइएको छ।

प्रभावित क्षेत्रका बासिन्दामध्ये:

• ६५ प्रतिशत शेयर बझाङ जिल्लाको बुङ्गल नगरपालिका वडा नं. ६ (साविक पिपलकोट गा.वि.स. वडा नं. ४, ५ र ७०) र वडा नं. ७ (साविक कफलसेरी गा.वि.स. वडा नं. १०) का अति प्रभावित बासिन्दाका लागि छुट्याइएको छ।

• ३५ प्रतिशत शेयर बुङ्गल नगरपालिका वडा नं. १, २, ३, ४, ५, ८, ९, १० र ११ का सामान्य प्रभावित बासिन्दाका लागि छुट्याइएको छ।

त्यस्तै, वैदेशिक रोजगारीमा रहेका नेपालीका लागि कुल शेयरमध्ये १० प्रतिशत अर्थात् २ लाख ७ हजार ५ सय कित्ता शेयर निष्कासन गरिनेछ। यसमा प्रतिकित्ता मूल्य १०० रुपैयाँ कायम गरिएको छ।

आईपीओमा न्यूनतम १० कित्तादेखि अधिकतम २० हजार कित्तासम्म आवेदन दिन सकिनेछ। आयोजनाबाट प्रभावित क्षेत्रका बासिन्दाका लागि आवेदन खुला असार २९ गतेदेखि साउन ११ गतेसम्म रहनेछ। आवश्यक परेको खण्डमा आवेदन अवधि साउन २६ गतेसम्म लम्ब्याइनेछ। वैदेशिक रोजगारीमा रहेका नेपालीले भने साउन ११ गतेभित्र आवेदन दिनुपर्नेछ।

कम्पनीलाई केयर रेटिङ नेपालले CARE-NP B (Single B) को इस्यूअर रेटिङ प्रदान गरेको छ, जसले औसत जोखिम रहेको संकेत गर्दछ।

बुङ्गल हाइड्रोले सञ्चालनमा ल्याएको माथिल्लो सानिगाड जलविद्युत् आयोजनाको क्षमता १०.७० मेगावाट रहेको छ। उक्त आयोजनाको कुल लागत ३ अर्ब २ करोड रुपैयाँभन्दा बढी रहेको छ भने प्रतिमेगावाट लागत २८ करोड २५ लाख रुपैयाँ छ। विद्युत् अनुमतिपत्रको म्याद अझै २६ वर्ष १० महिना बाँकी रहेको छ।

यो आयोजना अन्तर्गतको साधारण लगानी फिर्ता हुने समयावधि ९.८५ वर्ष रहेको छ भने छुटको आधारमा लगानी फिर्ताको अवधि २२.२९ वर्षको अनुमान गरिएको छ।

यस आईपीओको निष्कासन तथा बिक्री प्रबन्धक हिमालयन क्यापिटल लिमिटेड रहेको छ। स्थानीयबासिन्दाहरूले आवेदन फारम प्राप्त गर्न २ रुपैयाँ शुल्क तिर्नुपर्नेछ। वैदेशिक नेपालीले सी-आस्बा प्रणालीमार्फत आवेदन दिन सक्नेछन्।