काठमाडौं — नेपाल राष्ट्र बैंकका गभर्नर डा. विश्वनाथ पौडेलले सार्वजनिक गरेको आगामी आर्थिक वर्ष २०८२/८३ को मौद्रिक नीतिको प्रभाव बैंकिङ क्षेत्रमा प्रत्यक्ष देखिन थालेको छ। मौद्रिक नीतिमा ब्याजदर करिडोरको सीमाहरू घटाइएपछि वाणिज्य बैंकहरूले पनि आफ्नो मुद्दति निक्षेपको ब्याजदर क्रमशः घटाउँदै लगेका छन्।

नयाँ नीतिअनुसार बैंक दर ६.५ प्रतिशतबाट घटाएर ६ प्रतिशत, निक्षेप संकलन दर ३ प्रतिशतबाट घटाएर २.७५ प्रतिशत, र नीतिगत दर ५ प्रतिशतबाट घटाएर ४.५ प्रतिशतमा झारिएको हो। यसले बजारमा तरलता बढाउन सहयोग पुग्ने अपेक्षा गरिएको छ।

यसैको प्रभावस्वरूप अधिकांश बैंकहरूले साउन महिनाका लागि मुद्दति निक्षेपमा दिइने ब्याजदर घटाएका छन्। केही बैंकहरूले ब्याजदर यथावत् राखेका छन् भने केहीले सानो मात्रामा वृद्धि पनि गरेका छन्।

यस परिवर्तनसँगै केही विशेषज्ञहरूले निक्षेपकर्ताहरू अन्य क्षेत्रतर्फ मोडिने सम्भावना र पुँजी पलायनको खतरा बढ्न सक्ने चेतावनी दिएका छन्।