काठमाडौं, असार ९ – नेपाल स्टक एक्सचेञ्ज (नेप्से) परिसूचक मंगलबार करिब चार महिनाकै न्यून स्तरमा झरेको छ। लगातार सामान्य उतारचढाव देखिएको बजारमा यस दिन भने उल्लेख्य गिरावट आएको हो।

मंगलबार नेप्से परिसूचक २६.१६ अंकले घटेर २६७४ अंकमा कायम भएको छ। अघिल्लो कारोबार दिन परिसूचक १.४६ अंकले मात्रै घटेको थियो। हालको स्तर फागुन १७ यताकै सबैभन्दा न्यून हो। फागुन १७ गते नेप्से २७७३ अंकमा रहेको थियो।

कारोबार अवधिभर बजारमा बिक्री दबाब कायम रहँदा अधिकांश कम्पनीको सेयर मूल्य घटेको देखिएको छ। दिनभरको कारोबारमा कुल ४ अर्ब ३६ करोड रुपैयाँ बराबरको सेयर किनबेच भएको छ, जुन अघिल्लो दिनको ४ अर्ब ४४ करोड रुपैयाँको तुलनामा केही कम हो।

यस दिन २२ कम्पनीको सेयर मूल्य बढ्दा २३९ कम्पनीको मूल्य घटेको छ भने ११ कम्पनीको मूल्य स्थिर रहेको छ। क्षेत्रगत रूपमा उत्पादन तथा प्रशोधन समूहमा सबैभन्दा बढी १.९२ प्रतिशत गिरावट आएको छ। त्यसैगरी बैंकिङ ०.२९, विकास बैंक ०.४३, फाइनान्स १.२८, होटल तथा पर्यटन १.११, जलविद्युत् १.६३, लगानी १.०३, जीवन बीमा ०.८५, माइक्रोफाइनान्स ०.६९, निर्जीवन बीमा १.०१, अन्य ०.६७ तथा व्यापार समूह १.५७ प्रतिशतले घटेका छन्।

यद्यपि शुक्रबार मात्रै सूचीकृत भएका टक्सार पिखुवाखोला हाइड्रोपावर र याम्बलिङ हाइड्रोपावरको सेयर मूल्य भने १५–१५ प्रतिशतले बढेको छ। वृद्धि पछि दुवै कम्पनीको प्रतिकित्ता मूल्य ३९६ रुपैयाँ ७० पैसा पुगेको छ।

अर्कोतर्फ बुंगल हाइड्रोपावरको सेयर मूल्य १५ प्रतिशतले घटेको छ। एपोलो हाइड्रोपावर ११.१२ प्रतिशत, सोपान फर्मास्युटिकल्स ७.०५ प्रतिशत तथा कालिन्चोक हाइड्रोपावर ५.६४ प्रतिशतले घटेका प्रमुख कम्पनीमा परेका छन्।

कारोबार रकमका आधारमा आँखुखोला जलविद्युत्, सोपान फर्मास्युटिकल्स, रिलायन्स स्पिनिङ मिल्स, एनआरएन इन्फ्रास्ट्रक्चर र बुंगल हाइड्रोपावर सबैभन्दा बढी कारोबार हुने कम्पनी बनेका छन्।

समग्रमा, बजारमा बिक्री चाप बढेसँगै नेप्से करिब चार महिनाकै न्यून स्तरमा पुगेको छ भने अधिकांश उपसूचक र कम्पनीहरूको सेयर मूल्यमा गिरावट देखिएको छ।