काठमाडौं । नेपाली वाणिज्य बैंकहरूले निक्षेप संकलनमा उल्लेखनीय वृद्धि गरेका छन्। आर्थिक गतिविधि विस्तारै गतिशील बन्दै गएसँगै बैंकहरूमा निक्षेप र कर्जा दुवैको प्रवाह बढेको देखिएको छ।

नेपाल राष्ट्र बैंकमा दर्ता भएका २० वटा वाणिज्य बैंकहरूले गत आर्थिक वर्ष २०८१/८२ को चौथो त्रैमासिकसम्म कुल ६४ खर्ब ४३ अर्ब ७१ करोड रुपैयाँ निक्षेप संकलन गरेका छन्। यो अघिल्लो वर्षको ५६ खर्ब ६५ अर्ब ५७ करोड रुपैयाँको तुलनामा १३.७३ प्रतिशतले बढी हो।

एनआइसी एशिया बाहेक सबै बैंकको निक्षेप बढेको छ। सबैभन्दा बढी वृद्धिदर एभरेष्ट बैंकको देखिएको छ, जसले निक्षेपमा २८.६३ प्रतिशतले वृद्धि गरेको छ। ग्लोबल आइएमई, नबिल र राष्ट्रिय वाणिज्य बैंक शीर्ष तीन बैंक हुन्, जसको निक्षेप ५ खर्बभन्दा बढी पुगेको छ।