काठमाडौं – मोबाइल तथा इन्टरनेटको पहुँच विस्तारसँगै नेपालमा विद्युतीय भुक्तानीको कारोबार तीव्र रुपमा वृद्धि भइरहेको छ। नेपाल राष्ट्र बैंकको तथ्यांकअनुसार चालु आर्थिक वर्षको कात्तिक महिनामा विद्युतीय भुक्तानीको रकम ९४ खर्ब ८६ अर्ब ४६ करोड रुपैयाँ पुगेको छ, जुन गत वर्षको सोही अवधिको तुलनामा २.७५ गुणाले बढी हो।

भुक्तानीका विभिन्न माध्यमहरूमध्ये मोबाइल बैंकिङ अग्रस्थानमा रहेको छ। कात्तिक महिनामा मात्र मोबाइल बैंकिङमार्फत ४ करोड ३९ लाखभन्दा बढी पटक कारोबार भएको छ। त्यस्तै, क्यूआर कोडमार्फत १ करोड ९३ लाख पटक, डेबिट कार्डमार्फत १ करोड ९ लाख, र क्रेडिट कार्डमार्फत २ लाख ७६ हजार पटक कारोबार भएको छ।

ठूला रकमका लागि प्रयोग हुने आरटीजीएस प्रणालीमार्फत कात्तिकमा ७८ खर्ब १९ अर्ब रुपैयाँ बराबरको भुक्तानी भएको छ, जबकि गत वर्षको सोही महिनामा २२ खर्ब ४७ अर्ब रुपैयाँको कारोबार भएको थियो। यसैगरी, इलेक्ट्रोनिक चेक क्लियरेन्स (इसीसी) प्रणालीमार्फत ४ खर्ब ३९ अर्ब, आइपीएसमार्फत १ खर्ब ६३ अर्ब, मोबाइल बैंकिङमार्फत ३ खर्ब ७४ अर्ब, वालेटमार्फत ३७ अर्ब, र क्यूआर कोडमार्फत ६६ अर्ब ८७ करोड रुपैयाँ बराबरको भुक्तानी भएको छ।

राष्ट्र बैंकका अनुसार विद्युतीय भुक्तानी पूर्वाधारको विकास, सेवाको प्रोत्साहन, र सर्वसाधारणको विद्युतीय उपकरणप्रतिको रुचि बढ्दै गएकाले यस्तो वृद्धि भएको हो। विद्युतीय भुक्तानीका विभिन्न सेवाहरू जस्तै कनेक्ट आइपीएस, मोबाइल बैंकिङ, वालेट, क्यूआर कोड, तथा आइपीएसको प्रयोग पनि लगातार बढ्दै गएको तथ्यांकले देखाएको छ।