काठमाडौं । श्रीनगर एग्रीटेक इण्डष्ट्रिज लिमिटेडले आफ्ना शेयरहरू सर्वसाधारणका लागि निष्काशन खुला गरेको छ। कम्पनीले उद्योग प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीहरूका लागि भदौ ११ गतेदेखि आईपीओ आवेदन खुला गरेको हो।

कम्पनीले जारी पूँजी १ अर्ब ६३ करोड १२ लाख ५० हजार रुपैयाँको २० प्रतिशत अर्थात ३२ लाख ६२ हजार ५०० कित्ता साधारण शेयर निष्काशन गर्न पाएकोमा, उद्योग प्रभावित क्षेत्रका स्थानीयका लागि १ लाख ६३ हजार १२५ कित्ता र वैदेशिक रोजगारीमा रहेका नेपालीका लागि ३ लाख ९ हजार ९३८ कित्ता छुट्याइएको छ।

आवेदन न्यूनतम १० कित्तादेखि अधिकतम १० हजार कित्तासम्म गर्न सकिनेछ। स्थानीयका लागि निष्काशन बन्द हुने मिति छिटोमा भदौ २५ र ढिलोमा असोज ९ हुनेछ भने वैदेशिक रोजगारीमा रहेका नेपालीका लागि छिटोमा भदौ १५ र ढिलोमा भदौ २५ मा बन्द हुनेछ।

यस आईपीओको बिक्री प्रबन्धक नबिल इन्भेष्टमेन्ट बैंकिङ लिमिटेड रहेको छ। स्थानीय बासिन्दाले नबिल बैंक, एनएमबि बैंक र ग्लोबल आइएमई बैंकका पाल्पा र रुपन्देहीस्थित शाखाबाट आवेदन दिन सक्नेछन्। वैदेशिक रोजगारीमा रहेका नेपालीहरूले भने सम्पूर्ण सि–आस्बा सदस्य बैंक तथा वित्तीय संस्थाबाट आवेदन दिन सक्ने व्यवस्था मिलाइएको छ।