काठमाडौं / साउन १९– सिवाईसी नेपाल लघुवित्त वित्तीय संस्था लिमिटेडले आर्थिक वर्ष २०८१/८२ को चौथो त्रैमाससम्मको अपरिष्कृत वित्तीय विवरण सार्वजनिक गरेको छ। सो विवरणअनुसार लघुवित्तको खुद नाफा अघिल्लो वर्षको तुलनामा उल्लेखनीय रूपमा वृद्धि भएको छ।

गत आर्थिक वर्षको सोही अवधिमा ३ करोड ८० लाख रुपैयाँ नाफा कमाएको लघुवित्तले यस वर्ष ११ करोड ७४ लाख रुपैयाँ खुद नाफा आर्जन गरेको छ, जुन २०८.४४ प्रतिशतले बढी हो। नाफा वृद्धिको मुख्य कारण खुद ब्याज आम्दानी तथा सञ्चालन मुनाफामा देखिएको सुधार हो।

समीक्षा अवधिमा लघुवित्तको खुद ब्याज आम्दानी ४१.३० प्रतिशतले बढेको छ भने फि तथा कमिशन आम्दानी भने १६.१५ प्रतिशतले घटेको छ। यस अवधिमा कुल सञ्चालन आम्दानी २९.४८ प्रतिशतले र सञ्चालन मुनाफा २५०.५३ प्रतिशतले वृद्धि भएको छ।

लघुवित्तको वितरणयोग्य मुनाफा २ करोड ९७ लाख रुपैयाँबाट बढेर ९ करोड १० लाख रुपैयाँ पुगेको छ। सोही अवधिमा प्रति शेयर आम्दानी (ईपीएस) २९ रुपैयाँ ८० पैसाले बढेर ४४ रुपैयाँ ९ पैसा पुगेको छ। असार मसान्तसम्ममा प्रतिशेयर वितरणयोग्य आम्दानी ३४ रुपैयाँ १७ पैसा, प्रतिशेयर नेटवर्थ २७७ रुपैयाँ १७ पैसा र मूल्य–आम्दानी अनुपात ४०.२८ गुणा रहेको छ। प्रति शेयर कुल सम्पत्ति मूल्य २७६ रुपैयाँ ८४ पैसा रहेको छ।

हाल लघुवित्तको चुक्ता पूँजी २६ करोड ६४ लाख रुपैयाँ छ भने जगेडा कोषमा ४७ करोड २० लाख रुपैयाँ सञ्चित रहेको छ। पछिल्लो एक वर्षमा निक्षेप तथा सापटी १०.४९ प्रतिशतले र कर्जा ४.९६ प्रतिशतले वृद्धि भएको देखिन्छ। यसले गर्दा वित्तीय सूचकहरू सन्तोषजनक देखिएको लघुवित्तले जनाएको छ।