काठमाडौं । चालु आर्थिक वर्षको ११ महिनामा (साउनदेखि जेठसम्म) नेपालका निर्जीवन बीमा कम्पनीहरूले कुल ३९ अर्ब ८८ करोड ४० लाख रुपैयाँ बराबरको व्यापार गरेका छन्। नेपाल बीमा प्राधिकरणको तथ्यांक अनुसार, यसमध्ये सबैभन्दा ठूलो हिस्सा मोटर बीमाको रहेको छ।

मोटर बीमाले कुल निर्जीवन बीमा व्यापारको २९.४४ प्रतिशत हिस्सा ओगटेको छ। सो अवधिमा मोटर बीमाबाट मात्र ११ अर्ब ७४ करोड ५१ लाख रुपैयाँ बीमा शुल्क आर्जन गरिएको छ। अघिल्लो वर्षको तुलनामा बीमा शुल्कमा ७.१९ प्रतिशत वृद्धि भए पनि मोटर बीमालेख बिक्री भने ६.०४ प्रतिशतले घटेको छ। अघिल्लो वर्षको सोही अवधिमा १५ लाख २६ हजार ८३५ बीमालेख बिक्री भएकोमा, यस वर्ष १४ लाख ३४ हजार ५४७ मा झरेको छ।

दोस्रो ठूलो योगदान सम्पत्ति बीमाको रहेको छ, जसको हिस्सा २५.४० प्रतिशत छ। यसअन्तर्गत ११ महिनामा १० अर्ब १३ करोड १२ लाख रुपैयाँ बीमा शुल्क आर्जन भएको छ। सम्पत्ति बीमालेख बिक्री दर पनि ३.८९ प्रतिशतले घटेको छ।

तेस्रो स्थानमा इन्जिनियरिङ ठेक्का जोखिम बीमा रहेको छ, जसको योगदान १७.३१ प्रतिशत रहेको छ। यसअन्तर्गत बीमा शुल्क ६ अर्ब ९० करोड ४० लाख उठाइएको छ, जुन अघिल्लो वर्षको तुलनामा १०.८३ प्रतिशतले बढी हो। बीमालेख संख्या पनि १३.५७ प्रतिशतले बढेर ३२ हजार ६४४ पुगेको छ।

त्यस्तै, विविध बीमा, सामुन्द्रिक बीमा, हवाई बीमा, कृषि तथा बाली बीमा र लघुबीमाको पनि उल्लेख्य उपस्थिति देखिएको छ।