काठमाडौं — रवि लामिछाने नेतृत्वको राष्ट्रिय स्वतन्त्र पार्टी (रास्वपा) ले १३ चैतमा बालेन्द्र शाह लाई प्रधानमन्त्रीसहित मन्त्रीहरूलाई एकै समारोहमा शपथ गराउने तयारीलाई तीव्र बनाएको छ। प्रधानमन्त्री र मन्त्रिपरिषद् गठनका लागि लामिछाने र शाहबीच निरन्तर छलफल चलिरहेको छ भने आवश्यकताअनुसार अन्य शीर्ष नेताहरू र सम्भावित मन्त्रीहरूसँग पनि परामर्श भइरहेको छ।

प्रधानमन्त्री शाहसँगै शपथ लिने सम्भावित मन्त्रीहरूको सूचीमा अर्थमन्त्रीका लागि स्वर्णिम वाग्ले र परराष्ट्रमन्त्रीका लागि शिशिर खनाल लगभग निश्चित देखिएका छन्। सुनील लम्साल लाई पनि मन्त्री बनाउने सहमति भए पनि उनको मन्त्रालय टुंगिएको छैन। उनलाई भौतिक पूर्वाधार तथा यातायात मन्त्रालय दिने वा गृह मन्त्रालयको जिम्मेवारी दिने विषयमा छलफल भइरहेको स्रोतले जनाएको छ।

मन्त्रिपरिषद्मा कम्तीमा तीन महिला मन्त्री रहने तयारी गरिएको छ। यसमा सोबिता गौतम र इन्दिरा राना लाई मन्त्री बनाउने विषयमा गम्भीर छलफल भइरहेको छ। सोबितालाई सभामुख बनाउने विकल्पसमेत खुला राखिएको नेताहरूले बताएका छन्।

रास्वपाले मन्त्रालयको संख्या १५ देखि १८ बीचमा राख्ने र बढीमा १५ जना मन्त्री बनाउने तयारी गरेको छ। आवश्यकता अनुसार एक मन्त्रीलाई दुई मन्त्रालयको जिम्मेवारी दिने विकल्प पनि छलफलमा छ। उपप्रधानमन्त्री राख्ने वा नराख्ने विषयमा भने अझै निर्णय भइसकेको छैन।

५ चैतमा रोयल सिंगे होटल मा भएको बैठकबाट मन्त्रीहरूको सूचीबारे प्रारम्भिक छलफल सुरु भएको थियो, जसमा लामिछाने, शाहसहित शीर्ष नेताहरू सहभागी थिए। त्यसयता सरकार गठन, प्राथमिकता र कार्ययोजना तय गर्ने काम निरन्तर अघि बढाइएको छ।

रास्वपा प्रवक्ता मनीष झाले प्रधानमन्त्रीसँगै सबै मन्त्रीले शपथ लिएर तत्काल काममा लाग्ने गरी तयारी भइरहेको बताएका छन्। उता महामन्त्री कबिन्द्र बुर्लाकोटी ले मन्त्रालयको संख्या र जिम्मेवारी बाँडफाँटबारे अझै अन्तिम निर्णय नभएको स्पष्ट पारेका छन्।

सरकारका सुरुवाती प्राथमिकतामा सुशासन, मन्त्रालय सुधार र पार्टीको वाचापत्र कार्यान्वयनलाई केन्द्रमा राखिएको छ। रास्वपाले अघिल्लो सरकारका राजनीतिक नियुक्तिहरू पुनरावलोकन गर्ने, क्षमताका आधारमा मात्र नियुक्ति गर्ने र अनावश्यक पद खारेज गर्ने नीति लिएको जनाएको छ।

१२ चैतमा बस्ने केन्द्रीय समिति बैठकले संसदीय दलको नेता चयन गर्नेछ, जहाँ शाहलाई दलको नेता चयन गर्दै प्रधानमन्त्री बनाउने तयारी छ। प्रतिनिधिसभामा रास्वपाको एकल बहुमत (१८२ सांसद) रहेकोले सरकार गठन सहज हुने देखिन्छ।