काठमाडौं – नेपाली सांगीतिक क्षेत्र, विशेष गरी सुगम संगीत, पछिल्लो समय केही सुस्त देखिएको छ। यद्यपि, यो विधाका गीतहरूको दर्शकमा आकर्षण भने घटेको छैन। तर, सर्जक र कलाकारहरूको अनिच्छाका कारण नयाँ गीतहरू सार्वजनिक हुने क्रम कम भएको देखिन्छ।

यसै क्रममा, युवा सर्जक बाबु विनोदको उत्कृष्ट शब्दरचना रहेको नयाँ गीत मिठो सन्देश हालै मात्र सार्वजनिक भएको छ। थोरै मात्र गीत लेख्ने विनोदले छोटो समयमा नै कुशल सर्जकको रूपमा आफ्नो परिचय स्थापित गर्न सफल भएका छन्।

जापानमा वैदेशिक रोजगारी गरिरहेका विनोदले यसअघि पनि सुगम संगीतका उत्कृष्ट रचनाहरू प्रस्तुत गरेका थिए। व्यावसायिक सफलता भन्दा पनि गीत-संगीतमा योगदान दिने उद्देश्यका साथ गीत सार्वजनिक गरेको उनको भनाइ छ।

चर्चित युवा गायक करण परियारको स्वर रहेको यस गीतमा कृष्ण बाजुरालीले संगीत संयोजन र सिर्जना गरेका छन्। माया प्रेमलाई विषयवस्तु बनाइएको यस गीतको सम्पूर्ण पक्ष निकै उत्कृष्ट छ।

गीतको म्युजिक भिडियोमा बिमल अधिकारी र विनु राउतले अभिनय गरेका छन् भने निर्देशन प्रविन थापाले गरेका हुन्। गीतले सामाजिक सञ्जालमा छोटो समयमा नै सकारात्मक प्रतिक्रिया प्राप्त गरिरहेकोछ।