हिम स्टार ऊर्जा कम्पनी लिमिटेडले जेठ ३० गतेदेखि आईपीओ निष्काशन गर्ने भएको छ। कम्पनीले आयोजना प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीहरूलाई लक्षित गर्दै शेयर बिक्री गर्न लागेको हो।

कम्पनीले कुल ३७ करोड ३० लाख रुपैयाँ बराबरको जारी पूँजीमध्ये ३० प्रतिशत, अर्थात ११ करोड १९ लाख रुपैयाँ बराबरको ११ लाख १९ हजार कित्ता शेयर निष्काशन गर्ने अनुमति पाएको छ।

यस मध्ये आयोजना प्रभावित क्षेत्रका स्थानीयका लागि १ लाख ८६ हजार ५०० कित्ता शेयर निष्काशन हुनेछ। यी शेयर प्रतिकित्ता १०० रुपैयाँ दरमा बिक्री गरिनेछ। आवेदन दिने अधिकार ओखलढुंगा जिल्लाको खिजिदेम्बा गाउँपालिका वडा नं. ८ अन्तर्गतको साविक भुसिङ्गा गाविसका सबै वडा र सोलुखुम्बु जिल्लाको लिखुपिके गाउँपालिका वडा नं. २ अन्तर्गत साविक गोली गाविसका वडा नं. १ देखि ५ का बासिन्दाले पाउनेछन्।

त्यसैगरी, वैदेशिक रोजगारीमा रहेका नेपालीहरूका लागि सर्वसाधारणका लागि छुट्याइएको शेयरको १० प्रतिशत अर्थात ९३ हजार २५० कित्ता शेयर निष्काशन गरिनेछ। यी शेयरमा आवेदन दिने व्यक्तिहरूले नेपाल सरकारबाट श्रम स्वीकृति प्राप्त गरी विदेशमा काम गरिरहेको हुनु पर्नेछ।

न्यूनतम १० कित्ता र अधिकतम १० हजार कित्तासम्मका लागि आवेदन दिन सकिनेछ। आयोजनाका लागि आवेदन दिने अन्तिम मिति स्थानीय बासिन्दाका हकमा छिटोमा असार १३ गते र ढिलोमा असार २९ गतेसम्म कायम गरिएको छ। वैदेशिक रोजगारीमा रहेका नेपालीहरूले भने असार १३ गतेभित्र आवेदन दिनु पर्नेछ।

आईपीओ निष्काशनका लागि गरिएको रेटिङ्गमा इक्रा नेपालले कम्पनीलाई 'ICRA NP Issuer Rating BB-' दिएको छ, जसले औसत स्तरको जोखिम संकेत गर्दछ।

कम्पनीको ५ मेगावाट क्षमताको बुकु कापटी खोला जलविद्युत आयोजना सञ्चालनमा रहेको छ। यस आयोजनाको कुल लागत १ अर्ब २३ करोड ८५ लाख ३६ हजार १३५ रुपैयाँ रहेको छ भने प्रति मेगावाट लागत २४ करोड ७७ लाख ७ हजार ३८७ रुपैयाँ रहेको छ। आयोजनाको विद्युत अनुमतिपत्रको अवधि २७.७ वर्ष बाँकी छ भने लगानी फिर्ता हुने अवधि सामान्य अवस्थामा ७.१४ वर्ष र छुटमा ११.७५ वर्ष रहेको छ।

शेयर बिक्री तथा निष्काशन प्रबन्धक एनआईसी एशिया क्यापिटल लिमिटेड रहेको छ। आवेदन सिटिजन्स बैंक इन्टरनेशनलको लिखुपिके शाखा, खिजिदेम्बा गाउँपालिका वडा नं. ८ को महिला भवन र जनस्वास्थ्य भवन तथा सोलुखुम्बुको वडा नं. २ को वडा कार्यालयबाट दिन सकिनेछ। साथै, बिक्री प्रबन्धकको वेबसाइटमार्फत पनि आवेदन दिन सकिनेछ। आयोजना प्रभावित बासिन्दाले फाराम शुल्क २ रुपैयाँ तिर्नुपर्नेछ।

वैदेशिक रोजगारीमा रहेका नेपालीहरूले नेपाल धितोपत्र बोर्डबाट स्वीकृत सि-आस्बा सदस्य बैंक तथा वित्तीय संस्थाहरूबाट सि-आस्बा प्रणालीमार्फत आवेदन दिन सक्नेछन्।