काठमाडौं— पार्टीको माग पुरा गरे प्रधानमन्त्री केपी शर्मा ओलीलाई विश्वासको मत दिने बताउँदै आएका जनता समाजवादी पार्टी (जसपा) नेपालका नेता राजेन्द्र महतोले पनि ओलीको साथ छाडेका छन् । महतो प्रधानमन्त्री ओलीलाई विश्वासको मत नदिने भए पछि जसपा भित्र महन्त ठाकुर एक्लिएका छन् ।
जसपा अध्यक्ष उपेन्द्र यादव, संघीय परिषद् अध्यक्ष डा.बाबुराम भट्टराई लगायतका नेताहरू पहिलेदेखि नै ओलीको विपक्षमा थिए । पार्टीले राखेका माग पूरा गरेमा सरकारलाई समर्थन दिने पक्षमा उभिँदै आएका महतोले सरकारले सबै माग पूरा नगरेको भन्दै विश्वासको मत दिन नसकिने भए पछि प्रधानमन्त्री ओलीको सत्ता संकटमा पर्ने देखिएको छ । महतोनिकट नेताका अनुसार यथास्थितिमा सरकारलाई विश्वासको मत दिन उपयुक्त नहुनेमा निष्कर्षमा महतो पुगेका हुन् ।
यादव–भट्टराई पक्षले कार्यकारिणी बैठक आयोजना गरी बहुमतबाट सरकारविरुद्ध अविश्वास प्रस्ताव आए समर्थन गर्ने निर्णय लिइसकेको थियो । महतो पनि सोही पक्षमा उभिने भएपछि अध्यक्ष ठाकुर अल्पमतमा पर्ने देखिएको छ ।
निलम्बित भएका २ जना बाहेक जसपासँग ३२ सांसद रहेका छन् । नेकपा एमालेका पुरै सांसदले ओलीको पक्षमा मतदान गरे पनि जसपाको साथ चाहिन्छ । एमालेका माधव नेपाल पक्षले के गर्ने अझै टुंगो लागेको छैन । अब जसपाका बहुमत सांसदले ओलीको विपक्षमा मतदान गर्ने देखिएको छ ।