काठमाडौं । चालु आर्थिक वर्षको १० महिनाको अवधिमा वाणिज्य बैंकहरुको कर्जाको वृद्धिदर निक्षेपको तुलनामा बढी देखिएको छ। नेपाल बैंकर्स संघको तथ्यांक अनुसार, असार मसान्तदेखि वैशाख मसान्तसम्म वाणिज्य बैंकहरुको कर्जा लगानी ७.४४ प्रतिशतले बढेर ४९ खर्ब १० अर्ब रुपैयाँ पुगेको छ। सोही अवधिमा निक्षेप संकलन भने ६.७५ प्रतिशतले मात्र बढेर ६१ खर्ब ४३ अर्ब रुपैयाँमा सीमित भएको छ।

कर्जाको तुलनामा निक्षेपको वृद्धि कम हुनुले बैंकहरुको तरलता व्यवस्थापनमा नयाँ चुनौती देखिएको छ। तर यसले आर्थिक गतिविधिमा सुधारको संकेत पनि दिएको बताइएको छ। केन्द्रीय बैंकका अनुसार, वस्तु आयातमा वृद्धि भएसँगै कर्जा प्रवाह पनि उच्च बनेको हो। विशेषगरी सेवा र औद्योगिक क्षेत्रका कम्पनीहरुले आयातका लागि कर्जा लिएका कारण समग्र कर्जा प्रवाहमा वृद्धि देखिएको हो।

हाइड्रोपावर लगायत अन्य क्षेत्रमा पनि बैंकहरुको लगानी विस्तार हुँदै गएको छ। बैंकर्स संघका प्रमुख कार्यकारी अधिकृत अनिल शर्माका अनुसार, अहिले देखिएको सुधारलाई स्थायी भन्न मिल्ने अवस्था भने छैन, यद्यपि कर्जा र निक्षेपको प्रवाह समानान्तर रुपमा बढिरहेको उल्लेख गरेका छन्।

१८ वटा वाणिज्य बैंकको कर्जा लगानीमा वृद्धि भएको छ भने एनआईसी एसिया र प्रभु बैंकको कर्जा लगानीमा गिरावट आएको छ। ग्लोबल आइएमई बैंकको कर्जा प्रवाह सबैभन्दा धेरै ४ खर्ब ४० अर्ब रुपैयाँ पुगेको छ भने एभरेष्ट बैंकले कर्जा लगानीमा सबैभन्दा उच्च वृद्धि हासिल गरेको छ।

निक्षेप संकलनको हिसाबले ग्लोबल आइएमई बैंक अगाडि रहेको छ, जसले ५ खर्ब ४० अर्ब रुपैयाँभन्दा बढी निक्षेप संकलन गरेको छ। निक्षेप वृद्धिमा एनएमबि बैंक अगाडि देखिएको छ। यता, सीडी रेसियो (कर्जा-निक्षेप अनुपात) औसत ७९.२६ प्रतिशतमा कायम रहेको छ भने राष्ट्रिय वाणिज्य बैंकको सीडी रेसियो ६४.४० प्रतिशतसम्म झरेको छ। यो अनुपात नेपाल राष्ट्र बैंकले तोकेको अधिकतम ९० प्रतिशतभन्दा निकै कम हो।